ကျမမြတ်နိုးတဲ့ သဘာဝရဲ့အလှတရား (ကမ်းခြေအမှတ်တရ)

     ကောင်းကင်ပြာပြာမှာ အဖြူရောင် တိမ်ဆိုင်တွေက ဆောင်းရာသီမှာ ပွင့်တဲ့  နှင်းပန်းတွေ ပင်ထက်မှာ အဆုပ်လိုက် ပွင့်နေသည့်အလား... ဖရိုဖရဲနဲ့ သဘာဝကျကျလှနေတာ ဟိုမှာတစ်ခိုင် ဒီမှာတစ်ခက်ပေါ့...  
     တရွေ့ရွေ့နဲ့ လေပြေချို တို့ သယ်ဆောင်တဲ့နောက် ကောက်ကောက်ပါအောင် လိုက်ပါ နေသလို ကျယ်ပြောလှတဲ့ ပင်လယ်ပြင်ကြီးဆီမှာလည်း လှိုင်းဖွေးဖွေးလေးတွေက သွားလိုက်လာလိုက်နဲ့ ပြေဆော့ ကစားရင်း ကမ်းခြေကို ဆိုက်ကပ်တဲ့ လှိုင်းရိုက်တဲ့ အသံတွေကို နားစွင့်မိတော့ သာယာတဲ့ သံစဉ်တစ်ပုဒ်အလား သာယာ ညိမ့်ညောင်းလို့ နေလေရဲ့....  အခုလို ညှို့ယူ နိုင်လွန်းတဲ့ သဘာဝရဲ့ အလှတရား တွေကို ကျမ အရမ်းကို မြတ်နိုး နှစ်သက် မိပါတယ်...

         ကောင်းကင်နဲ့ ပင်လယ်ပြင်ကြီးရဲ့ လိုက်ဖက်စွာနဲ့ တင့်တယ်နေတဲ့ သဘာဝအလှ လေးကို ရင်ခုန်သံ စည်းချက်မှန်စွာ နဲ့ ကဗျာဆန်ဆန်လေး ခံစားတက် တဲ့ကျမကို ရူးသွပ်နေတယ်လို့ ဝေဖန်ပြောဆို ကြမှာလားဟင်... ဝေဖန်သံလေးများ ကြားခဲ့ရင်လည်း ကျမ လစ်လျှူရှု့ထားမိမှာ မဟုတ်ပါဘူး..................         ဘာဖြစ်လို့လဲဆိုတော့ အဲ့လိုဝေဖန်တဲ့ စကားလုံးတွေကို လှလှပပလေး သီကုံးပြီး သီချင်းတစ်ပုဒ်လို ခံစား သီဆိုလိုက်မိမှာအမှန်ပါပဲ... သာယာလွန်းနေတဲ့ ဒီမြင်ကွင်းလေးမှာ ကြည်နူးစွတ်ပျံ့စွာ ညိမ့်ညိမ့်လေး စီးမျောရင်း ကျမရဲ့ စိတ်ဝိဥာဉ်ကို ဆွဲဆောင်နိုင်လွန်းတဲ့ ဒီရေလှိုင်းလေးတွေကို မနာလိုတောင် ဖြစ်ချင်မိပါရဲ့...။

    

  

       ဒီနေ့မနက် နေရောင်ခြည်တွေ ကလန့်ကာအဖွင့်မှာ ကမ်းခြေရဲ့ သာယာတဲ့အလှကို ပန်းချီဆရာ များရဲ့ စုတ်ချက်ကတွေက အံ့သြစရာကောင်းလောက်အောင် အလှမ်းမမှီနိုင်သလို ကဗျာဆရာ တွေအတွက်တော့ ကာရံလှတဲ့ စကားစပ်တွေနဲ့ အတွေထဲစီးမျော သွားအောင် အရမ်းကို သာယာ လှပနေလိုက်တာလေ... သဘာဝရဲ့ အလှတရားတွေကို နက်နက်ရှိုင်းရှိုင်း ချစ်မြတ်နိုးတက်သူ ကျမတစ်ယောက် ကိုယ့်ခံစားချက်နဲ့ကို ရှုခင်းလေးတွေကို မမောနိုင် မပမ်းနိုင် တဖျတ်ဖျတ်နဲ့  ဓါတ်ပုံတွေ လျှောက်ရိုက်နေမိတာပေါ့.....။

  

 ကြည့်ပါအုံးနော်... 

ဒီပုံလေးက လိုက်ဖက်လှတဲ့ ကောင်းကင်ပြာပြာကြီးရယ်... ပြီးတော့ ရေပြာပြာမှာ လှိုင်းပြေပြေလေးတွေနဲ့ တင့်တယ်နေတဲ့ ပင်လယ်ပြင်ကြီးရယ်...  ဟိုး.... အဝေးကြီးမှာ ထိစပ်နေပုံက ကျမရဲ့ အမြင်အာရုံတစ်ချို့ကို လန်းဆန်းနေစေတယ်လေ... ကောင်းကင်နဲ့ ပင်လယ်ဆိုတာ မိုးနဲ့မြေလိုပဲ အရမ်းကို အလှမ်းကွာလွန်းတယ် ဆိုပေမယ့် တစ်နေရာရာမှာတော့ သွားပြီး ဆုံတွေ့ခွင့် ရတာပဲနော်... သူတို့တွေရဲ့ အလှက ကိုင်းကျွန်းမှီ ကျွန်းကိုင်းမှီဆိုသလိုပဲ... ခိုင်းနှိုင်းပြ ရရင်တော့ အရမ်းချစ်ကြတဲ့ ချစ်သူတွေလိုပေါ့... ဒီကောင်းကင်ကြီးကြောင့် ပင်လယ်ပြင်ကြီး အသက်ရှင်နေရသလို ဒီပင်လယ်ပြင်ကြီးကြောင့်လည်း ကောင်းကင်ကြီးက လှပစွာနဲ့ ရပ်တည်ခွင့် ရနေတာလေ...  တစ်ယောက်ရဲ့ အတွင်းစိတ်ကို တစ်ယောက်က သိနေသလို ပင်လယ်ပြင်ကြီး လွမ်းနေချိန်မှာ ကောင်းကင်ကြီးက ငိုနေမှာ အသေအချာပဲနော်... အဟင့် ပြောရင်းနဲ့တောင် လွမ်းချင်လာပြီ... (ကြော်ငြာဝင်တာပါ)... အတွေးတွေနယ်လွန်ရင်း သူတို့နှစ်ဦးရဲ့ ဆုံမှတ်လေးဆီ အပြေးအလွှား သွားလိုက်မိတာတော့ ကျမရဲ့ စိတ်ဝိဥာဉ် လိပ်ပြာငယ်လေးပေါ့ကွယ်.....

    

      ဒီမြင်ကွင်းလေးက တော့ စိတ်ကူးယဉ်ဆန်တဲ့ ပန်းချီကား တစ်ချပ်အလား ထင်ရတယ် ဆိုပေမယ့် သေသေချာချာ ဝေဖန် သုံးသပ်ကြည့်တော့ လောကကြီးက သဘာဝကျကျနဲ့ အပြစ်မြင်စရာ မရှိလောက်အောင် တရားမျှတမှု ရှိပါတယ်လေ... အမှန်တစ်ကယ်ပါ.. ကျမရဲ့စိတ်၊ ကျမရဲ့အမြင်လွှာ အာရုံတွေကို မယုံကြည်နိုင် လောက်အောင် အလစ်သုတ်ခြင်း ခံလိုက်ရပြီပဲ....
     

    
      ဒီပုံလေးကတော့ ချစ်သူနှစ်ဦး ကမ်းခြေက သဲသောင်ပြင်မှာ သဲအိမ်လေးဆောက်နေတာလေ... ကြည်နူးစရာလေးပေါ့... နွေလယ်ခင်းကြီး ဘယ်လောက်ပူပြင်းပါစေ ချစ်သူနဲ့သာဆို တူနှစ်ကိုယ် သဲအိမ်လေးဆောက်လို့ ပျော်ရွှင်စရာ ရသလေးတွေ တစ်ခုပြီးတစ်ခု ဖန်တီးနေမိမှာ အမှန်ပဲပေါ့နော်...
     

     

         အုန်းစိမ်းရေလေး သောက်ပါအုံးလား... နေပူဒဏ်ကို ခံနိုင်ရည်ရှိဖို့ အုန်းစိမ်းရေက ဖေးကူးထားတယ်တဲ့လေ... ပြီးတော့ အုန်းစိမ်းရေသောက်ပြီးမှ ရေထဲဆင်းရင်၊ လှိုင်းစီးရင် အပူမရှပ်တော့ဘူးတဲ့..... ရောင်းတဲ့သူတွေပြောတာပဲ... ကျမလည်း ကမ်းခြေရောက်ရင် အုန်းစိမ်းရေ ဘာကြောင့်သောက်ကြလဲဆိုတာ အခုမှပဲသိတော့တယ်။

    

         ဒီလိုအချိန်မျိုး ကုန်ဆုံးသွားမှာကို ရင်တုန်အောင် ကြောက်နေမိသူက ကျမရယ်ပါ... တဖြည်းဖြည်းနဲ့ ဆည်းဆာချိန်ကို ကျောခိုင်းလို့ နေမင်းကြီးလည်း ပျောက်ကွယ်လုနီးပြီ... ဒီမြင်ကွင်း လေးတွေ ကြည့်မ၀ခင်မှာပဲ နေမင်းကြီးကွယ်ပျောက်လို့ အမှောင်ထုက ကြီးစိုးနေတော့မှာ... တိတ်ဆိတ်တဲ့ ဒီညမှာ အမှောင်ယံကို အန်တုလို့ ကဗျာတစ်ပုဒ် ဖန်ဆင်းနေတုန်း တစ်ချက်တစ်ချက် ကြားမိလိုက်တဲ့ ဟိုအမှောင်ထဲက ထစ်ချုန်းလာတဲ့ မိုးခြိမ်းသံကို ကျမနှလုံးသားက လက်မခံနိုင်လောက်အောင် မုန်းတီးမိတာတော့ မဆန်းလောက်ပါဘူးနော်... အိပ်စက်ခြင်းဆိုတဲ့ အကြီးမားဆုံးရန်သူကို လစ်လျှူရှုလို့ မပြီးနိုင်သေးတဲ့ ၀တ္ထုတစ်ပုဒ်ကို ဆက်ရေးရင်း တစ်မိုး သောက်ခဲ့ပြန်ပါတယ်... 

     အလုပ်ကိစ္စနဲ့ ခရီးသွားရင်း အမှတ်မထင် ချောင်းသားကိုရောက်သွားတယ်... အမှတ်တမဲ့ပေမယ့် အမှတ်တရဖြစ်အောင်း ကျမမြတ်နိုးတဲ့ သဘာဝရဲ့အလှတွေကို မှတ်တမ်းတင်နိုင်ခဲ့တယ်လေ... ကျမချစ်တဲ့ ဘလော့ဂါမောင်နှမ မိတ်ဆွေ သူငယ်ချင်းတွေဆီလည်း အလည်မရောက်တာတောင် အတော်ကြာပေါ့... ကျမရဲ့ဘလော့အိမ်လေးကို ကျမမရှိတဲ့အချိန်မှာ အလည်လာပေးတဲ့ သူငယ်ချင်းတွေကို ကျေးဇူးတင်ပါတယ်နော်... ပိုစ်တွေမတင်ဖြစ်တာလည်း အရမ်းကြာသွားသလို ဒီအိမ်လေးကို ပြစ်ထားမိလို့ အားငယ်နေမလားပဲ... အလုပ်ဘယ်လောက်များပေမယ့် စာရေး၊ စာဖတ်တာရူးသွပ်သူမို့ မကြာမကြာတော့ ရေးနိုင်အောင်ကြိုးစားပါ့မယ်...

                                                                အားပေးသူ သူငယ်ချင်းမိတ်ဆွေများကို

                                                                      အစဉ်လေးစားချစ်ခင်လျက်

                                                                                လေပြေချို  (11:30 PM)